[
[هنا بتبدا احداث قصه الحب لبطلنا احداث غريبه
(شازلى )سامحونى قلت على اسمه شازلى ده على فكرة صحبى جدا وحبيبى واكتر من اخ
بس مبالغ شويتين (فاكر نفسه دنجوان ههههه)
المهم عشان مطولش عليكو بطلنا كان ساكن فى منطقه رقيه جدا وكلها هدوء (طبعا كلها هدوء مش اموات )بطلنا كان ساكن جمب طرب الغفير مش فيها بس جمبها المهم شازلى كان جمبه بوتيك ازياء (حلوة بوتيك دى بدل دكان )وكانت بطلتنا بتشتغل فى البوتيك بتاع الازياء ده المهم كل يوم يخرج بطلنا لابس الحته الزفرة وحاطت ازازة الجيل على شعره(امو 75قرش دى)
ويخرج يقف قدام البوتيك بالساعات عشان بطلتنا تبص عليه او تاخد بالها منه طبعا هو شايف ناس دخله وخرجه بتشترى لبس كان كل تفكيرة انه ازاى يوصل لبطلتنا (هو اساسا مفيش فى جيبه 25قرش يجيب تلاته فرط)عشان يدخل المحل يشترى اى حاجه ويكلم بطلتنا ويخلص الموضوع
لحد ما فى يوم من الايام ماشى واحد صحبه فشافه واقف (طبعا صحبه ده مش انا )قال له ايه يازميلى واقف كدة ليه رد عليه بطلنا قائلا لا مفيش د انا بس كنت مستنى واحد صحبى عشان ريحين مشوار قال له ماتيجى معايا ياصحبى ندخل البوتيك ده نشوف كان فى بنطلون حلو قوى عجبنى كنت عاوز اشتريه رد عليه بطلنا لا ياعم روح انت احسن صحبى ييجى ميلقنيش (وهو نفسه يدخل بس عامل فيها تقيل)المهم قال تعالى بس ياعم
***...***...***...***...***...***...***...***...***...***...***...***...***...***
...***...***...***...***...***...***...***...***...***...***...***...***...***...*
وكانت اللحظه الحاسمه وياريتك ياصحبى ما دخلت معاه وقف صاحب بطلنا قدام البنت وهاتك يارغى وبطلنا واقف عمال يتفرج على اللبس وهو من جواه هيفرقع الى ان قطع هذا الصمت قائلا:مش هتدخل تقيس البنطلون يا عمنا ولا هتقيسه هنا قدام الناس؟..فالتفت اليه سيد (دا اسم صاحبه جبتهلكم من الكنترول اى خدعه)..اه اه طيب داخل اهوه..واتجه سيد الى غرفه القياس بينما وقف شازلى امام تلك الفتاه مبتسما ببلاهه والبنت تنظر اليه وتبتسم...الى ان بدات هيا الكلام قائله:ممكن اسالك سؤال؟فاجاب بطلنا على الفور اه طبعا طبعا..فقالت له انا بشوفك كل يوم بتيجى تقف قدام المحل شويه وتمشى فى حاجه؟..فتلعثم بطلنا (اتلخبط اقصد)..ثم قال:لا ابدا انا بكون مستنى حد من اصحابى وكده...وكمان عشان...
(اخيرا هينطق)..
وهنا خرج سيد مرتديا البنطلون وهو يصيح :ها ايه رايك ياض يا شازلى؟حلو هاه؟ ولا توم كروز فى فيلم الخطايا...فالتفت اليه شازلى :اه جامد جدا فعلا..يلا عالبركه...وعاد سيد الى غرفه القياس وهو مازال ينظر الى الينطلون فى اعجاب...( اول مره يجيب حاجه نضيفه)..وعاد بطلنا الى صمته مره اخرى..وجاء سيد عشان يدفع الفلوس..قائلا:خلاص يا سمر (عرف اسمها امتى ابن اللذينا)
: ماشى هاخده ..بكام؟
فقالت سمر:150 بس..وهنا فتح سيد فمه ولا الفك المفترس قائلا فى ضجر:نعم؟ 150 ايه؟ ليه كنت شارى بنطلون عمر الشريف؟(اشمعنى عمرالشريف يعنى)...فقالت له سمر:لا دا ماركه نضيفه
: جدا..فقال لها لا لا مكنتش اعرف ان المحل ده حراميه كده..فقالت له سمر:لا لا مينفعش كده يا فندم انك تغلط فى المحل..فقال لها سيد :لا انا اغلط فى المحل زى مانا عايز ..وهنا قال بطلنا عيب كده ياسيد مينفعش نغلط فى الناس واحنا عندهم..نطلع بره وقول اللى انت عايزه (لا ياراجل)..وبدون كلام شد بطلنا الواد سيد من ايديه الى خارج المحل بعد ان اعتذر لسمر عن (قله ادب صاحبه)..وخرجا سويا
الى الخارج..
ومضى اليوم وشازلى قاعد برضه بيفكر فى البنت اياها....الى ان لمحها خارجه من المحل وكانت المفاجاه...
اتجهت سمر نحو بطلنا قائله فى رقه انا متشكره اوى على اللى عملته النهارده..فقال بطلنا لا ابدا انا معملتش حاجه...هوه سيد كده مدب من يومه..بس انا كنت عايز اطلب منك طلب..؟فاجابت سمر على الفور اتفضل..فتابع بطلنا:انا كنت عايز اعزمك على اتنين كازوزا كده عالكورنيش عشان اكلمك فى
: موضوع مهم..فسكتت سمر قليلا ثم قالت..ماشى بس بسرعه عشان مينفعش اتاخر...(ايوه ياعم ماشيه معاك)..
وبالفعل اتجه بطلنا شازلى مع سمر الى كورنيش قصر النيل..وبدا بطلنا فى الكلام قائلا..سمر..انا ...انا ...انا ...انا...انا...
فقاطعته وهى تبتسم انت ايه؟(بتعمل عبيطه قال يعنى مش فاهمه...)..فقال لها شازلى انا بصراحه معجب بيكى جدا...ومن ساعه مشوفتك وانا عايز اكلمك
وقبل ان ترد عليه سمر ..
فوجد مجموعه من الشباب دخلين عليه قائلين (ايوة ياعم اللى اداك يدينا )وبطلنا عامل فيها عبده العبيط (وهو ميقدرش يرد اساسا ليضرب) ...
واحد من الشباب جاى على سمر وبيحاول يمسكها ....(اتحرك بقى يا اخى اعمل اى حاجه)....
راح بطلنا ماسك الواد وهاتك ياضرب راحو الشباب مسكين شازلى بطلنا...
(بصريح العبارة كدة ظبطوه خد اللى فيه النصيب)...الى انا جائت الشرطه
(جيين بعد ايه بعد ماشازلى كان فاضله دقيقه ويبقى فى خبر كان)...
المهم بطلنا قال للشرطه ان سمر خطيبته طبعا سابوه عشان صعب عليهم...
(لسه الدنيا بخير ههههه....)
وهنا زاد اعجاب سمر ببطلنا شازلى ....
(الواد ده فكرنى بفلم اللمبى.هههه)...
طبعا خدته على اقرب صيدليه عشان تداوى الجروح اللى فى وشه وبعدين قالت له معلش اسيبك انا عشان اتاخرت ونتقابل وقت تانى...
رد بطلنا قائلا طب استنى لما اروحك مش يمكن حد يضيقك وانا مش معاكى
(الواد فاكر نفسه فريد شوقى ههههه).....
قالت له لا معلش متخفش عليا انا بميت راجل ....
رجعت بطلتنا الى البيت سالمه غانمه ....
ورجع بطلنا بس مش على البيت رجع على بيت سيد صحبه وحكا له على اللى حصل كله ....
سيد: يخرب بيتك ياشازلى بقى كل ده يطلع منك انت هههههه..
شازلى: خلاص بقى ياعم متقطمناش يعنى انا عملت اللى محدش عمله ..
سيد:طب قولى على الاقل كنت نصحتك ..(على اساس ان سيد ده روميو او قيس ههه.)
المهم عشان مطولش عليكو رجع بطلنا الى البيت وفى الصباح الباكر قايم من نومه نشيط جدا خلاص بقى البت حست بيه وشكلها كدة هتبدا تحبه ....
وكالعاده ضرب قزازة الجيل فى شعره تقريبا كلها (امو 75 قرش دى هههه.)
وراح جرى يقف امام البوتيك عشان بطلتنا تعبره وفجاة!!!!!!
وجد بطلنا شاب واقف مع سمر بيتكلم معاها !!!!
دخل جرى على المحل؟؟
انتى ازاى يا انسه تقفى مع شاب متعرفهوش وعماله تتكلمى معاه وتضحكى ؟؟
وبطلتنا وقفه مش عرفه ترد عليه ؟؟؟
رد الشاب قائلا تطلع مين بسلامتك عشان تقول لها كدة ؟؟؟
اطلع مين انا هوريك انا مين ولسه بطلنا هيرفع ايده
الى ان ردت سمر قائله فى صوت منخفض ؟؟؟
ده اخويا الكبير يخرب بيتك !!!!
وقف شازلى منبهر (متنح ومكسوف من نفسه ..)
اخو بطلتنا مدلوش فرصه يتكلم وهاتك ياضرب تشششششششششششش
على وشه وبالشلوط ....
قال له اياك اشوف وشك هنا تانى لو شفتك هنا تانى هعلقك من رجليك
وبكدة بطلنا بوظ الموضوع بايده
النهايه

ارجو منكم الردود على الموضوع
اخوكم محمد عبد الظاهر

الموضوع منتهاش يامحمد وبعدين انا لسه بحبك
بس ليه مكتبتش فى القصه انك البطل الحقيقى
وبعدين ليه كتبت بوتيك ازياء
مكتبتش ليه ان البطله وقفه فى صيدليه
على العموم انا مستنياك ترد عليا لاما على الاميل لاما على التليفون